النهارده هاعملكم حاجه سهله اوي
وهيا كروت الألوان الأساسيه وطريقة عمل علبه
احترافيه لحمايتها
ركزو معايا كويس الشغل اللى جاي ده عاوز دماغ صاحيه
ولو نايمه او مكسله
قومي اعملي مج نسكافيه كده يفوقك وتعالى كملي 😀
كروت تعليم الألوان الأساسيه سهله وبسيطه
وهناخد فكرتها تقريبا من كروت الصنفره اللى عملناها قبل كده
وهناخد فكرتها تقريبا من كروت الصنفره اللى عملناها قبل كده
الأدوات :
مقص
غراء
ورق نصبيان او ورق كرتون
قلم للتحديد
مسطره للقياس
استيكر ألوان بالألوان الأساسيه (أحمر-أصفر-أزرق)
وهاستخدم هنا لون أبيض كمان عشان هاعمل بيه العلبه
الأدوات دي متوفره في المكتبات
وهتلاقوها كلها في مكتبة كاميرا 9 بأمر الله وممكن
تستعملو ورق النصبيان بدل النوع اللى انا باستخدمه
اولا هتقطعي 6 كروت بالمقاس اللي يعجبك
انا كبرت الكروت شويه عن
المقاسات الجاهزه لأن الطفل في السن ده
بيحب وبينتبه للمقاسات الكبيره ..
وهتقطعي اجزاء العلبه الأربع جوانب
بمقاسات اكبر شويه من مقاسات الكروت
وتلزقي الطول والعرض والأرضيه بالغرا
وتسيبيها لحد ما تنشف خالص
ده شكل الكروت والعلبه بعد التقطيع
ونيجي بقا للتغليف وده اتعلمناه بالتفصيل
في
هتقيسي مقاس الكارت وتزودي تقريبا 5 سم
على المقاس اجمالى للجوانب عشان
التغليف يكون كامل من كل الجوانب
وتقصي الزيادات وده شكل الكروت والعلبه بعد التغليف
الجديد اللى هنعمله هنا هنعمل غطاء للعلبه جميل
بطريقه بسيطه هاشرحها بالتفصيل :
هتقيسي مقاس جنب من جوانب العلبه ومقاس قاعدة العلبه
وتضيفيهم على بعض
وهتقطعي كارت بمقاسهم وتعملي علامه بين مقاس الجنب ومقاس قاعدة العلبه زي
كده
وبعدين هتقصيهم بالشكل ده
بعد كده هتجيبي الاستيكر الأبيض
وتغلفي ضهر الكارت وهو منفصل كده وتسيبي
مسافه 1 سم بين القطعتين فاضيه زي كده
الجزء اللى حواليه دايره ده والمشار اليه بالسهم
خدي بالك منه كويس لازم يكون فيه 1سم فاضي بين القطعتين
ومتغلف تحتهم
ودي صوره مكبره للمنطقه دي توضح المسافه بينهم
ادهني القطعه اللي منغير غلاف دي بغرا
وهاتي الورق المقوى اللي بتشيليه من
الاستيكر لما تيجي تلزقيه وحطيها في المكان ده
فايدة الورق المقوى ده هيديكي متانه اكتر للفاصل بين القطعتين
وميخليهاش تتقطم بسهوله
كملي لزق باقي الاستيكر فوق الورق المقوى بالشكل ده
بقا عندك غطاء للعلبه ممكن ينتني عليها
بس ازاي هنلزقه والاستيكر ده بيزحلق
ومبيخليش اي غرا اولاصق يثبت عليه ؟
انا هاقولك
هاتي كتر وحددي منطقه
وبالراحه اقطعي شريحه خفيفه من الاستيكر في القطعه
الصغيره زي دي
وهاتي العلبه والجنب اللى هتلزقيه فيه
اقطعي نفس مساحة الشريحه تقريبا زي كده
وهاتي الغرا وادهني المكانين المفرغين
والزقيهم كويس
مبروك بقا عندك علبه بغطا زي الجاهز
وأحسن كمان وتقدري تحافظي على
الكروت والشغل اللى تعبتي فيه بطريقه سهله جدا
ويمكنكم مشاهدة هذا الفيديو لمعرفة كيفية استخدام الكروت مع الطفل
يارب أكون أفدتكم وللأمانه وانا قاعده باعمل غطاء عادي للعلبه
زوجي (جزاه الله خيرا ) شافني واقترح عليا اعملها متنيه
فنفذتها ومنها جاتلى فكرة علبه تانيه
هانفذها واشرحهالكو في موضوع تاني بقا بأمر الله ..
لا تنسوني من صالح دعائكم بالله عليكم ..
والسلام عليكم ورحمة الله وبركاته ..
جزاكم الله خيرا لكن الفيديو غير موجود