بوس طنط ياحبيبي ..
ادي حضن لعمو يا قلبي ..
ايه ده انت نستني والا ايه مش عاوز تديني بوسه طب انا رخم بقا وهاخد بالعافيه ..موووووووواه
والأم والأب نازلين ضحك :O
شفت الواد مش راضي يدي خالته بوسه ..
شفتي البت مش راضيه تدي عمها حضن ..
ترد عليه الأم وهي بتضحك .. تستاهل ده عمك ازاي متديلوش حضن :/
ايه يابت انتي مفكره نفيسك كبرتي والا ايه تعالي اقعدي على رجلي ..
والعيله كلها هات يا ضحك :O
مش هاوصف الحدث ده لأني لو وصفته مش هيكفيني اني اروح اضرب الأم والأب دول
اه اضربهم لأنهم يستحقوا الضرب 🙂
هارد بموقف حصل في العيد مع ريتال
كنا عند جدو وطبعا يوم العيد ناس كتير بتيجي تعيد على والدي
في حد منهم لمح ريتال بتجري جوا البيت
فقالها تعالي سلمي عليا وهاتي بوسه ..
والدي ندهلها وقالها تعالي ياتوته سلمي على عمو ..
وريتال مش عاوزه تسلم خالص 😀
جت جري تقولي ماما انا مش عاوزه اسلم عليه 🙁 و مش عاوزه جدو يزعل 🙂
وللعلم ريتال طفله عندها 3 سنوات ونص 🙂
اتكسف انا بقا ؟
اتحرج واخدها من اديها واقولها لا يا حبيبتي سلمي على عمو وبوسه وحضن مواه مواه ؟!!!
لأ طبعااااااااااااااااااااا ولأ ومليون لأ
قلتلها براحتك حبيبتي مش عاوزه تروحي تسلمي متسلميش 😀
وطبعا سألتها ليه رافضه وفهمت انها رافضه موضوع البوسه
ودخل بابا عليا وانا باتكلم معاها قالي في إيه
قلتله ياجدو الموضوع بسيط خالص توته مش عاوزه تسلم على عمو ومش عاوزه جدو حبيبها يزعل منها 🙂
راح نازل في الارض في مستواها وقالها براحتك ولو مش عاوزاه في البيت اطردهولك خالص :v – بيهزر طبعا –
راحت ماسكه فإيده وقالتله انا هاجي معاك بس مش هاسلم عليه
واتفقنا تدخل تقول السلام عليكم بس منغير ما تروح لعمو ولا يلمسها ولا حضن ولا بوسه 🙂
عمرها ما كانت هترضى تروح تقولو سلام عليكم حتى الا لما لقتنا احترمنا رأيها ..
بيت القصيد :
من حق الطفل أن يوافق على من يحمله ويقبله ويلمسه
وليس للأم أو الأب أي حق في اجبار الطفل على تقبيل أي شخص مهما كان
ولو كانت ريتال رفضت تبوس جدو نفسه كان تقبل الموقف وابتسملها وخلاص
عارفه ان اغلب الناس هتقولي والدك تقبل كده لكن في أهل مش بيوافقو ا
هقولكم القرار بإيدكم انتم بسسسسسسسسسسس
ده طفلكم .. محدش هيقدر يجبركم تعملو حاجه انتو مش عاوزينها
اتكلمو بنتهي الجديه والاحترام للطفل هتجبري اللي قدامك يحترم رأيك
ولو محترمش هو حرررررررررر وانا حره في تربية طفلتي 🙂
ولو والدي ما كانش وافق وحاول يجبرها على انها تروح كنت قلتله اسفه يابابا مش هتروح الا لما توافق 🙂
بطلو تنتهكو حرمات الأطفال عشان انتو مكسوفين او محروجين لما الطفل بيرفض
انتو كده بتخلو الطفل لو حد تحرش بيه او انتهك حرمته ميقدرش يقول لأ لأن بابا وماما بيوافقو على كده وبيضحكوا كمان 🙁
الطفل مش هيفرق بين التحرش وعدمه .. كله بالنسباله عافيه وانتهاك لحرمته
انا لما باشوف اي طفل حتى من اولاد صديقاتي باستأذنه الاول قبل ما المسه ولو رفض بابتسم واقوله براحتك 🙂
مش لازم كل ما نشوف طفل نحط ايدنا على شعره ووشه ونبوس ونحضن
متقولو ازيك وتتكلمو معاه الأول
هو حد يقدر ييجي يبوسك وياخدك في حضنه غصب عنك ؟
هو الطفل ده مش انسان زيك ؟
توضيح : انا كلامي في البوست واضح جدا ياجماعه
الكلام هنا عن السلام اللمسي والجسدي مش السلام بالكلام
واظن اني قلت اني اتفقت انا وريتال انها تخرج تقول للضيف السلام عليكم
فمش شايفه له اي لزوم بقا كلام الناس اللي بتقول ازاي متسلمش على الضيف
والله الضيف مش المفروض اخده بالحضن وابوسه 😀
كلامي واضح والله معتقدش ان فيه أي لبس
الكلام على التواصل الجسدي
الكلام على اللمس وانتهاك حرمة جسد الطفل بدون رغبه منه في البوسه او الحضن 🙂
#من_حق_الطفل_يقول_لأ
#اتقوا_الله_في_حرمات_الأطفال
#مش_عشان_ضعيف_تجبروه
#هاجي_اضربك_ياللي_بتقولي_متكبروش_الموضوع
#التحرش_نسبته_بقت_ترعب
#احموهم_وحافظوا_عليهم
#مكعبات
#مواقف_رتولة
رابط البوست على الأكونت : اضغط هنا