بدأت مع ريتال مرحلة التدريب على البوتي من سن سنتين الا كام شهر
– كان في محاولات من اول سن سنه
لكن كانت بترفض تماما فكنت باركن البوتي خالص –
لأن الطفل بيقدر يتحكم في عضلات الإخراج تقريبا
عند سنتين ولحد سنتين ونص
الطفل الطبيعي المفروض يكون متحكم تحكم كامل
– كل قاعدة وليها شواذ وطفل عن طفل بيفرق –
الله يخليكي يا شيخه بالله عليكي سيبك من كلام
: ايه ده هو عنده سنه ولسه مبيعرفش يقعد
عالبوتي ده بنت جاره خالة عمة مش عارف مين
ابنها لسه في بطن امه وبيعمل في البوتي
كل ما تضغطي كل ما تتعبيه وتأخري تقبله
للموضوع وتتعبي انتي وهو نفسيا
عملت ايه في موضوع البوتي ؟
ممنوع منعا باتااااااا اي ضغط عصبي
او نفسي على الطفل وقت التدريب على استخدام البوتي
طيب حلو لو الطفل استجاب يبقا خير وبركه
طب لو ما استجابش ؟
يبقا نسيبه شويه هو لسه مش جاهز
– اتعلمو تحترمو قدرات الطفل لو سمحتم
ومش معنى ان انتو قررتو فجأه ان الوقت ده
مناسب ان الطفل يتعلم انه يقعد على البوتي
يبقا فعلا الوقت مناسب !!!
الوقت مناسب ليكي انتي كأم
فهل سألتي نفسك هو مناسب لطفلي
ومتقبل الموضوع ده دلوقتي والا لأ ؟
ولأني مضغطش على ريتال خالص كانت كل ما
ترفض اركن البوتي وكأن مفيش حاجه حصلت
ونلعب عادي وقررت احط البوتي وسط اللعب
بتاعتها عشان تتعود عليها وتلعب بيها
وهنا في ملاحظه –
البعض بيحب البوتي متخرجش من الحمام
والبعض عادي عنده تكون في أي مكان
والبعض بثبت مكان بره الحمام
والبعض هيقولي اصل مش عارف مين قال
ومش عارف مين مقالش
أن اي شيء بطوعه بم يناسب بنتي
حتى لو كل نظريات التربيه شافته غلط –
أنا الأم وانا اللي شايفه وعارفه بنتي الأفضل ليها
إيه فمش شايفه انه حوار يعني اني الأول احط
البوتي وسط اللعب
وبعد كده لما تتعود عليها انقلها
في مكان تاني
اما عن ان الطفل بيبهدل البيت كله
والدنيا تتقلب مشمعات والواد مش عارف يمسك
نفسه وانا قرفت من حياتي والمرحلة دي مرحلة
مستفزه والحوارات الجميله دي
فاسمحيلي اقولك ان انتي اللي بتعملي كده فنفسك
اه والله انتي اللي بتعملي كده
لما تقرري فجأه تقلعي الطفل البامبرز
بدون ما تعملي شوية اختبارات وتشوفي مدى
تقبله وهل هو جاهز والا لأ وفي الاخر تشيلي
الطفل الذنب كله وكأنه أجرم انه معرفش يمسك نفسه
لازم يكون عندك تقبل انه اكيد اكيد مش كائن
فضائي وانه مش هيقدر من اول مره يمسك
نفسه والبامبرز بيتقلع بالتدريج مش مرة واحده
وهوووووووووووب يالا يابني على البوتيوخلصني بقا
بالتدريج ازاي : بصي لطبيعة طفلك واعرفي هيتقبل ايه ازاي وامتى وفين ؟
شوفي بقا بيصحا الصبح البامبرز بتاعه ناشف والا مبلول
شوفي بيقعد اد ايه بين كل فتره والتانيه على ما يعمل بيبي
شوفي البامبرز بتاعه بيتملي كل أد ايه ؟
بعد ما عملت لريتال شوية تمهيدات انها هتقلع البامبرز
جيت في يوم اشتريتلها ملابس داخليه ملونه
وجميله وشيلت كل البامبرز من البيت
وقلتلها في مفاجأه حلوه النهارده
لما توته تعمل بيبي في البوتي
وفعلا تشوقت وعملت
وخدتها وقلتلها يالا نجيب البامبرز
وروحنا على مكان البامبرز ملقيناش حاجه
ايه ده فين البامبرز
وبقت بنوته حلوه وكبيره وبتعمل في البوتي
فمشي خلاص وراح للبيبي الصغير
طيب ريتال هتلبس ايه بقا دلوقتي ؟
تعالي كده نشوف
ومدينا ادينا مكان ما البامبرز بيتحط
لقينا اندر وير جميل اوي وعليه اشكال بناتي :
الله توته البنوته هتلبس اندر وير زي الكبار خلاص
عشان هي كبرت مبروك ياتوتي
حضن كبير لماما بقا
وشوية دلع على احتفال لما بابا ييجي وتحكي
قدامه اد ايه توته بنوته شطوره وكبرت وخلاص
مفيش بامبرز تاني عشان هي بقت كبيره ..
مرحلة التواليت :
بعد كده هندخل على مرحلة التواليت :
ودي مرحلة الأم فيها بتتخنق أكتر من البوتي بقا
لأنها قاعده جنب الطفل في الحمام .. هااااااااااا
خلصت ياحبيبي .. لأ لسه … طيب يالا بقا
بالله عليكي يا شيخه في حد يعمل كده ؟
يعني ينفع حد يعمل معاكي كده ؟
واقفه جنب الولد ليه ؟
متدخليه وتقوليله هاستناك بره ولما تخلص اندهلي
احترمي خصوصيته شويه الله يكرمك
عشان هو يطلع يتعلم ازاي يحترم خصوصية غيره
وروحي اعملي اي حاجه كنتي بتعمليها
بس متروحيش تقعدي عالفيس بقا
والواد ينده طول اليوم وانتي ولا انتي هنا
طيب الأطفال بيخافو من التواليت لأن الفتحه اللي
فيه واسعه وبيخافو يقعو نعمل ايه ؟
هاتي قاعدة تواليت خاصة بالطفل بتبقا صغنونه
شويه وفي منها مبطن وفيه عادي
اختاري اللي يناسب طفلك
المشكله عندي بقا اني عودت ريتال علىالاستقلال
ازاي ؟
يعني هي نفسها بتتضايق لما تطلب مني يا ماما
امسكيني عشان اطلع على الكرسي واقعد
وبعدين لو سمحتي ياماما اخرجي
وبعدين ياماما خلصت وبعدين نزليني ياماما
طيب ايه الحل ؟
لقيت بوتي لطيفه كده فيها ايد من الناحيتين وفيها
درجة سلم فهي بتقوم بوظيفة الأم اللي بتسند
الطفل وبدور الكرسي اللي بيطلع عليه الطفل
جبت البوتي دي وجربتها وحلت المشكلة جدا
وانتهى دوري مع ريتال في دخول
الحمام فهي بتتعامل في كل حاجه
وممكن ما الاقيهاش قدامي ادخل اشوف هيا فين الاقيها
دخلت الحمام وقفلت الباب وتعاملت مع الموقف
– الحمد لله –
مرحلة الحمام واحنا بره البيت
اعمل فيها ايه ؟
ريتال تقبلت الوضع عادي بوضع كيس مفرغ من
النص ومخصص لشكل التواليت باحطه على اي بوتي بره وبتقعد وباسندها عادي
طيب مرحلة وقت النوم ؟
اولا الطفل اللي بيتعود تدريجيا على قلع البامبرز
مش مره واحده كده قفش بيكون اقدر على
التحكم في نفسه وقت النوم – افتكر ريتال عملت
ها مرتين او 3 بالكتير على السرير وكانت تعبانه كمان او اتعرت وسقعت مثلا
مشمع حطي مفيش مشاكل بس متحسسيش الطفل ان في حالة طوارئ
حاولي المشمع يكون ملوش صوت عالى –
في مشمعات بتكون مضغوطه كده ومبتعملش مشكله لو اتحطت تحت الملايه –
ولو الطفل صحي وعمل بيبي على نفسه وقت النوم ابتسمي فوشه وقوليله حصل خير المره الجايه تحاول
تمسك نفسك وتندهلي نروح التواليت ..
حسسيه انك بتسانديه مش واقفاله على الواحده
وشك وحضنك هما مقياسه وسنده وأمانه وبياخد ثقه فنفسه من حضنك ومن ابتسامتك